ရခိုင်ဝန်ကြီးချူပ်ဟောင်း ဦးမောင်မောင်အုန်းနှင့် အဆင့်မြင့် အစိုးရအဖွဲ့ဝင်ဟောင်းများ ပါဝင် ပတ်သက်နေသည့် စစ်တွေမြေအရှုပ်တော်ပုံ စုံစမ်းစစ်ဆေး

မင်းမျိုးနွယ်/RiA

စစ်တွေ၊ အောက်တိုဘာ ၁ ရက်။ စစ်တွေမြို့တစ်ဖက်ကမ်း၊ ဆတ်ရိုးကျရပ်ကွက် အတွင်းရှိ ဒေသခံများ မှီခို လုပ်ကိုင်လျှက်ရှိကြသည့် လယ်မြေများအား စက်မှုရပ်ကွက် တည်ဆောက်မည့် စီမံကိန်းကို အကြောင်းပြကာ သိမ်းဆည်းခဲ့ပြီး အိမ်ရာမြေများအဖြစ် သတ်မှတ်ခွဲဝေယူခဲ့ကြမှုတွင် ရခိုင်ပြည်နယ်အစိုးရအဖွဲ့ဝင်ဟောင်းများ ပါဝင် ပတ်သတ်နေမှုများနှင့် ပတ်သက်၍ စုံစမ်းစစ်ဆေးမှုများကို ပြုလုပ်နေပြီ ဖြစ်သည်။


ဆတ်ရိုးကျရပ်ကွက် အတွင်းမှ တောင်သူ ၁၆ ဦး ပိုင်ဆိုင်သည့် လယ်မြေ ၁၄၂ ဒဿမ ၁၉၇ ဧက၊ ဓနိတော ၃ ဧကနှင့် ကျေးတောရွာမမှ တောင်သူ ၇ ဦးတို့ ပိုင်ဆိုင်သည့် ၂၄ ဒဿမ ၇၁ ဧက တို့အား စက်မှုရပ်ကွက် တည်ဆောက်မှုကို အကြောင်းပြကာ သိမ်းဆည်းထားခဲ့ခြင်း ဖြစ်သည်။

မြေပိုင်ရှင်များကို အကြောင်းကြားမှု မရှိဘဲ ဒေသဖွံ့ဖြိုးရေးလုပ်ငန်းအတွက် စက်မှုရပ်ကွက် တည်ဆောက်ရန် သိမ်းဆည်းခဲ့ခြင်း ဖြစ်သော်လည်း ယခုအခါ ရခိုင်ပြည်နယ် အစိုးရအဖွဲ့ဝင်ဟောင်းများ၏ အမည်ပေါက် ဖြင့် အိမ်ရာအကွက်ရိုက်၊ ခြံစည်းရိုးခတ်မှု၊ အဆောက်အဦ ဆောက်လုပ်မှုများ ရှိနေသည်။

“ ဒီမြေတွေကို သိမ်းတာဟာ နည်းလမ်းမကျဘူးဆိုပြီး ပြောနေကြတဲ့ အချိန်မှာ သတင်းတွေက ထွက်ပေါ် လာခဲ့ပါတယ်။ အစိုးရအဖွဲ့က ဝန်ကြီးတွေနဲ့ ဌာနဆိုင်ရာ အရာရှိကြီးတွေဟာ သူတစ်ကွက် ငါတစ်ကွက် ဝေပြီး ယူထားကြတယ် ဆိုတာကို ကြားလာရတယ်။ စုံစမ်းကြည့်လိုက်တော့ ဝန်ကြီးချုပ်မောင်မောင်အုန်း အပါအဝင် ရဲမင်းကြီး၊ မြေစာရင်းဌာနတွေလည်း ပါတာကို သိရတယ်။ အဲဒီတော့ ကျွန်တော်တို့က မြေစာရင်းဌာနကို သွားပြီး မေးကြည့်တော့ အတွေ့မခံဘူး။ နောက်ပိုင်းမှာတော့ အတွေ့ခံပါတယ်။ အကျိုးအကြောင်းမေးကြည့်တော့ သူတို့နဲ့ မဆိုင်ဘူး။ ခရိုင်ထွေအုပ်ကိုပဲ သွားမေးကြည့်ပါလို့ပြောပါတယ်။ အဲဒီကိုသွားမေးတော့ ကျေးရွာတောက လယ်သမားတွေကို ပေးလိုက်ပြီဆိုပြီးတော့ ရုံးထဲကနေ နှင်ထုတ်ခံခဲ့ရပါတယ်။ စာရေးမ ဒေါ်စောခင်သောင်းက ရုံးကိုလည်းမလာနဲ့ စာလည်းမတင်နဲ့ တင်ရင်လည်းမရတော့ဘူး ဆိုပြီးတော့ပြောပါတယ်။”ကျးတောရွာမ တောင်သူ ဦးကျော်မောင်ကပြောသည်။

ယခင် စစ်အစိုးရလက်ထက်တွင် သိမ်းဆည်းခဲ့သည်မှာ ဒေသခံများ အလုပ်အကိုင် ရရှိရေးအတွက် စက်မှုလုပ်ငန်းများအား တည်ဆောက်နိုင်ရန်အတွက် ချမှတ်ခဲ့သည့် စီမံကိန်း ဖြစ်သော်လည်း ကြံ့ခိုင်ရေးအစိုးရ လက်ထက်တွင် ယင်းမြေများအား ထပ်မံ သိမ်းဆည်းယူခဲ့ခြင်းဖြစ်သည်။

သိမ်းဆည်းမြေပေါ်တွင် စစ်တွေမြို့ဖွံ့ဖြိုးရေး စီမံကိန်းများချမှတ်ကာ ဌာနဆိုင်ရာ ရုံးများ တည်ဆောက်ခြင်း၊ လူနေရပ်ကွက်များ တိုးချဲ့ခြင်း၊ တန်ဖိုးနည်းအိမ်ရာများ ဆောက် လုပ်ခြင်းတို့ကြောင့် ယခင်က တစ်ဧကလျှင် ကာလ ပေါက်ဈေး ၈ သိန်း ဝန်းကျင်ခန့်သာ ရှိနေခဲ့သည့် မြေများမှာ ယခုအခါ ၆၀×၄၀ အိမ်ရာ မြေ တစ်ကွက်လျှင် ကျပ်သိန်း ၄၀၀ ကျော်ထိ ပေါက်ဈေးရှိလာပြီး မြေကွက်များ ရောင်းဝယ်ခြင်း ရှိနေသည်။

လယ်ယာမြေ သိမ်းဆည်းခံထားရသည့် တောင်သူများဘက်မှ တင်ပြလာသည့် သိမ်းဆည်းခံ လယ်မြေများအား ပိုင်ဆိုင်သည့် သက်သေခံများဖြစ်သည့် မြေစာများ၊ ဂရံစာရွက်များ စသည့် စာရွက် စာတမ်းများနှင့် အကူအညီ တောင်းခံလွှာများအား စစ်ဆေးပေးရန် အကူအညီ တောင်းခဲ့ရာတွင်လည်း မြေစာရင်းဌာနမှ ဒေါ်စောခင်သောင်းက ယင်းစာရွက်များအား လွှင့်ပစ်လိုက်ပြီး တောင်သူများအား ရုံးအတွင်းမှ နှင်ထုတ်ခဲ့မှုများ ရှိကြောင်း သိမ်းဆည်းခံ မြေပိုင်ရှင်များက ပြောသည်။

“ကျွန်တော်တို့ကို အကြောင်းကြားထားတာလည်း မရှိဘူး။ တားမြစ်တာလည်း မရှိဘူး။ ကျွန်တော်တို့ လယ်သမားတွေက လယ်ပဲ လုပ်တတ်တာမို့ စက်မှုလုပ်ငန်းတွေ တည်ဆောက်လို့ ပိုတဲ့ မြေတွေကို ပြန်လိုချင်ပါတယ်။ လယ်သမားတွေ တော်တော်လေးကို အခက်အခဲရှိနေပါတယ်။” ဟု လယ်သမား ဦးရန်မျိုးအောင်က ပြောသည်။

အဆိုပါ မြေကိစ္စတွင် ရခိုင်ပြည်နယ် အစိုးရအဖွဲ့ဝင်ဟောင်းများ ပါဝင်ပတ်သက်နေမှုကို စစ်ဆေးနိုင်ရန် ပြည်နယ် လွှတ်တော် မြေယာ စိစစ်ရေးကော်မတီမှ အချက်အလက်များကို စုဆောင်းလျက်ရှိသည်။

“ အဲဒီမြေကိစ္စနဲ့ ပါတ်သက်ပြီးတော့ ပြီးခဲ့တဲ့ ၂၄ ရက်နေ့က လွှတ်တော်မှာ စုံစမ်းဖော်ထုတ်ရေး ကော်မတီတစ်ခုကို ဖွဲ့စည်း အတည်ပြုလိုက်ပါတယ်။ အဲဒီအဖွဲ့ကို စစ်တွေ မဲဆန္ဒနယ် အမှတ် ၁ က ဦးအေးသိန်း ဦးဆောင်ပြီးတော့ ဆောင်ရွက်မှာ ဖြစ်ပါတယ်။ နှစ်လ အတွင်းမှာ စစ်ဆေးချက်တွေကို တင်ပြသွားမှာ ဖြစ်ပါတယ်။ ၂၀၁၂ ခု မြေယာဥပဒေ၊ တခြား ဥပဒေတွေနဲ့ ခွဲဝေချထားမှုတွေဟာ ညီညွတ်မှုရှိမရှိကို စစ်ဆေးသွားမှာဖြစ်ပါတယ်။ အဲဒီမြေတွေကို စီမံခန့်ခွဲလိုက်တဲ့ သက်ဆိုင်ရာ လူကြီးတွေဆီက လိုအပ်တဲ့ စာရွက် စာတမ်းတွေကို တောင်းပြီးတော့။ လောလောဆယ် မှာတော့ ဒီနေ့ မနက်ပိုင်းက သက်ဆိုင်ရာလူကြီးတွေကို ကိုယ်တိုင် တွေ့ဆုံမှုတွေလုပ်ပြီးတော့ အချက်အလက်တွေကို တောင်းခံမှုတွေကို စပြီး လုပ်နေပါပြီ။” ဟု မြေယာ စုံစမ်းဖော်ထုတ်ရေးကော်မတီမှ လွှတ်တော် ကိုယ်စားလှယ် ဦးကျော်ဇောဦးကပြောသည်။

လယ်မြေများအား ပြန်လည်ရရှိရေးအတွက် ဆက်လက် ကြိုးစားနေချိန်တွင် သိမ်းဆည်းထားသူများက ယင်းမြေများအား ထပ်ဆင့် ရောင်းချလိုက်ကြသည့် အတွက် မြေနေရာ အများစုတို့မှာ စီးပွားရေး လုပ်ငန်းများ လက်သို့ ရောက်ရှိ သွားပြီးဖြစ်သည်။

သိမ်းဆည်းမြေပေါ်တွင် အဆောက်အဦးဆောက်လုပ်ခြင်း၊ အိမ်ရာမြေအကွက်ရိုက် ရောင်းချမှုများ ရှိနေပြီး တိုင်ကြားရန် ဆောင်ရွက်သူ လယ်သမားများအား ထောင်ချပစ်မည်ဟု ခြိမ်းခြောက်မှုများ ရှိနေကြောင်း သိမ်းဆည်းခံတောင်သူများက ပြောသည်။

သိမ်းဆည်းမြေယာများကို ကိုယ်ပိုင်ပြုမှုနှင့် တဆင့်ခံ ရောင်းချမှုများတွင် တိုက်ရိုက်ပတ်သက်နေသော ပြည်နယ် အစိုးရအဖွဲ့ဝင်ဟောင်းများကို ဆက်သွယ်ရန် ကြိုးပမ်းခဲ့သော်လည်း ဖုန်းလက်ခံဖြေဆိုခဲ့ခြင်း မရှိပါ။
--
photo script - စက်မှုဇုန်တည်ဆောက်ရန် သိမ်းဆည်းခဲ့သည့် စစ်တွေမြို့၊ ဆတ်ရိုးကျတဘက်ကမ်း မြေများ ( ဓာတ်ပုံ - မင်းမျိုးနွယ်/RiA)